आज आवर्जून तुझी आठवण आली...

🌸 आज आवर्जून तुझी आठवण आली... 🌸

(२०.०९.२०२६)

आज आवर्जून तुझी आठवण आली,

पण डोळ्यांत अश्रू दाटले नाहीत.

चेहऱ्यावर दुःखाचे सावट नव्हते,

आणि मनही खिन्न झाले नाही...

ओठांवर एक निखळ हसू होते,

मनात गोड आठवणींचा आनंद होता…

कारण –

आज मला माझा तो वाढदिवस आठवला,

जेव्हा तू मला पहिल्यांदाच गुलाबाचे फूल दिले होतेस.

वाढदिवस साजरा करायला न आवडणाऱ्या वडिलांनी –

माझ्यासाठी खास मागवून गुलाबाचे फूल दिले;

ही फार मोठी गोष्ट होती माझ्यासाठी...

कायम स्मरणात राहणारी..!

आज तू नाहीस,

पण त्या गुलाबाच्या फुलाचा सुगंध

अजूनही मनात तसाच दरवळतोय…

आज तुझी आठवण आली,

सोबत कोणतेही दुःख न आणता.

यालाच म्हणतात बहुतेक –

“एखाद्याच्या आठवणीत जिवंत राहणं!”

दुःख हळूहळू कमी होत नाहीसे होते,

पण आठवण मात्र तशीच राहते... 

कायमची.

आणि म्हणूनच, 

अश्रूंची जागा स्मितहास्य घेते..!

असाच राहशील तू कायम आठवणीत माझ्या –

मला पुढे जगण्याचं बळ देत.